Creative Mornings Tirana “Etika”

Karta Rinore Evropiane ( YouthAct Albania ) është partnere e CreativeMornings Tirana dhe si e tillë ishte e pranishme në eventin e rradhës.

Tema e muajit Shkurt për CreativeMornings Tirana ishte ETIKA. Kjo temë u zgjodh nga CM Madrid dhe design zyrtar i saj u krijua nga artisti CESS (César Cid).

Eventi u mbajt si zakonisht të premten, datë 26 shkurt, ora 9:30 @ Libraria Tirana Times.

Për të folur rreth kësaj teme ishte zgjedhur gazetarja Dalina Buzi.

“Të jesh etik në media, sipas opinionit tim, është të kuptosh përgjegjësinë që ke mbi lexuesit/shikuesit, duke i trajtuar ata jo si numër, por si njerëz të cilët duhet të mbështeten dhe të besojnë tek informacioni i vërtetë, i saktë, objektiv dhe i drejtë që ti jep.

Ekziston një Kod Etik në gazetari që aplikohet i njëjtë në të gjitha vendet demokratike. Fatkeqësisht, në Shqipëri vitet e fundit – me rritjen e shpejtë të mediave (gazeta, revista, televizion, media online) – është vënë re shpesh një dhunim i këtij Kodi nga vetë gazetarët, shpesh me qëllim, në një përpjekje për të kthyer median në një biznes të suksesshëm. Por ky Kod është shkelur gjithashtu edhe nga ata që kanë në pronësi një media dhe nuk kanë asnjë lidhje me gazetarinë dhe asnjë njohje për disa rregulla që gazetari apo zotëruesi i medias, duhet të ketë parasysh përpara se të publikojë një informacion.

Duke qënë se në Shqipëri nuk ka një sistem të fortë rregullator për të gjithë ata që dhunojnë Kodin Etik, sidomos vitet e fundit, me rritjen e papritur të medias online, unë besoj se etika në gazetari varet nga vetë gazetari/ja. Këto kohë, etika është më shumë një çështje karakteri sesa një rregull që duhet zbatuar symbylltas. Si pronare e një media online me influencë, me sinqeritet pranoj që ne jemi në një përpjekje të përditshme për të qënë sa më etikë, sepse çdo mëngjes, zgjohemi dhe përballemi me një numër shumë të madh informacionesh që na vijnë nga qindra burime.

Për më tepër, që një media online të jetë e fuqishme dhe të qëndrojë në krye të klasifikimeve, duhet të rifreskojë informacionet të paktën çdo 30 minuta (maksimumi). Ndaj, reporterët punojnë nën presion për të sjellë informacion të saktë dhe të drejtë brenda një kohe shumë të shkurtër. Por fatkeqësisht ka raste, që në nxitim e sipër për të publikuar lajmin, informacioni i dhënë shkel etikën, u shpreh Dalina Buzi.