Thirrje për Aplikime: Bootcamp-e Verore për të Rinj në Ballkanin Perëndimor

28/04/2025 Njoftime dhe Aktivitete

PLAY International, në kuadër të projektit “Shared Horizons” të financuar nga Ministria e Punëve të Jashtme të Francës, shpall thirrjen për pjesëmarrje në katër bootcamp-e verore për të rinjtë e Ballkanit Perëndimor. Këto kampe synojnë të promovojnë kohezionin social dhe pajtimin ndërmjet të rinjve nga Shqipëria, Kosova, Mali i Zi, Maqedonia e Veriut, Serbia dhe Bosnja e Hercegovina, përmes aktiviteteve edukative dhe ndërkulturore që mbështesin vlerat evropiane, olimpike dhe paralimpike.

Detajet e Bootcamp-eve:

Prishtinë, Kosovë: 30 qershor – 4 korrik 2025
Shkup, Maqedonia e Veriut: 14 – 18 korrik 2025
Tiranë, Shqipëri: 28 korrik – 1 gusht 2025
Podgoricë, Mali i Zi: 11 – 15 gusht 2025

Çdo bootcamp do të përfshijë 32 pjesëmarrës nga rajoni, të cilët do të angazhohen në aktivitete që zhvillojnë aftësi si udhëheqja, puna në grup, komunikimi dhe zgjidhja e problemeve. Programi ofron një mundësi unike për të ndërtuar miqësi të qëndrueshme dhe për të zgjeruar rrjetin rajonal të të rinjve të angazhuar në ndryshime pozitive shoqërore.

Kriteret e Pjesëmarrjes:

Mosha: 18–24 vjeç në kohën e bootcamp-it
Shtetësia dhe vendbanimi: Shqipëri, Bosnje dhe Hercegovinë, Kosovë, Mali i Zi, Maqedonia e Veriut ose Serbi
Njohuri të mira të gjuhës angleze
Dokumente të vlefshme udhëtimi për lëvizje ndërkombëtare
Angazhim për pjesëmarrje të plotë në bootcamp

Kriteret e Preferuara:

Interes në kohezionin social, përfshirjen dhe ndërtimin e paqes
Gatishmëri për të promovuar vlerat evropiane, olimpike dhe paralimpike
Inkurajohen aplikimet nga pakicat etnike dhe grupet e margjinalizuara
Potencial për ndikim afatgjatë në komunitet dhe rrjetin e të rinjve

Kostot dhe Akomodimi:

Udhëtimi: Pjesëmarrësit janë përgjegjës për organizimin e udhëtimit me transport publik; shpenzimet do të rimbursohen pas përfundimit të suksesshëm të bootcamp-it, me paraqitjen e faturave përkatëse.
Akomodimi dhe ushqimi: Sigurohen nga PLAY International, duke përfshirë fjetje në dhoma të ndara sipas gjinisë dhe tre vakte në ditë me pushime për kafe dhe pije.

Si të Aplikoni:

Plotësoni formularin e aplikimit këtu:
Shkarko formularin (PDF)

Afati i fundit për aplikim është data 30 prill 2025.

Për më shumë informacion mbi projektin “Shared Horizons” dhe aktivitetet e PLAY International, vizitoni:
www.play-international.org