Apliko për edicionin e 5 të EYCA Youth Panel

Jemi të lumtur të hapim aplikimet për edicionin e 5-të të EYCA Youth Panel!

Fytyra të reja, një mandat i ri dhe mundësi të reja për të bërë ndryshimin.

Tingëllon interesante? 😉 Vazhdo leximin për të zbuluar se çfarë po kërkojmë!

Çfarë është EYCA dhe çfarë është Paneli Rinor?

European Youth Card Association (EYCA) është një organizatë joqeveritare dhe jofitimprurëse, me organizata anëtare në 34 vende të Europës. Së bashku, ne punojmë për të fuqizuar të rinjtë në Europë. Organizatat anëtare të EYCA lëshojnë Kartën Rinore Europiane për më shumë se 9 milionë të rinj. Synimi ynë është të inkurajojmë sa më shumë të rinj që të jenë aktivë dhe të lëvizshëm në aspektin social, kulturor, arsimor dhe ekonomik.

EYCA Youth Panel përbëhet nga 11 të rinj, të moshës 18–29 vjeç, të përzgjedhur mes mbajtësve të Kartës Evropiane të Rinisë. Gjatë mandatit të tyre dyvjeçar, ata mbështeten nga një trajner i dedikuar dhe një koordinator, të cilët i ndihmojnë në realizimin e nismave të tyre. Kur u krijua për herë të parë, EYCA Youth Panel u konceptua për t’u dhënë mbajtësve të kartës një zë më të fortë brenda organizatës, veçanërisht në lidhje me politikat rinore. Që atëherë, paneli është zhvilluar në një program të mirëfilltë më vete. Sot, Youth Panel jep mendime dhe sugjerime për organizatën, kontribuon në drejtimin dhe zhvillimin e projekteve të EYCA, është përgjegjës për organizimin e nismave të veta të drejtuara nga të rinjtë.

Çfarë bënë EYCA Youth Panel

Si anëtar i EYCA Youth Panel, do të angazhohesh për të ndarë idetë, mendimet dhe perspektivën tënde, të veprosh si ambasador i Kartës Rinore Europiane, të përfaqësosh dhe të mbështesësh çështjet për të cilat ke pasion dhe të organizosh një projekt në shkallë të gjerë, duke u ofruar edhe të rinjve të tjerë një mundësi të ngjashme për t’u angazhuar dhe për të bërë ndryshimin.

Gjatë mandatit dyvjeçar, Youth Panel do të fokusohet në katër fusha kryesore:

1. Zhvillimi i një fushate të përbashkët Europiane mbi një temë që do të përcaktohet deri në fund të vitit.

2. Përfaqësimi i EYCA-s në evente dhe takime. Ju do të keni mundësinë të flisni në emër të organizatës në evente ndërkombëtare. Gjithashtu, do të merrni pjesë në takimet e brendshme të EYCA-s për të kuptuar më mirë mënyrën se si funksionon organizata.

3. Do të jepni ide dhe sugjerime për aktivitetet e EYCA-s dhe organizatën. Si ambasadorë të Kartës Rinore Europiane idetë tuaja për përmirësimin e nismave tona janë shumë të rëndësishme. Çfarë mund të bëjmë më mirë? Ku ka potencial për përmirësim? Këto janë pyetjet që do të shqyrtoni gjatë mandatit tuaj.

4. Kontributi në strategjinë e komunikimit dhe promovimit të Youth Panel. Si anëtar i Youth Panel, do të mendoni vazhdimisht se si të rrisni shtrirjen dhe ndikimin e nismave tuaja, në mënyrë që të përfshini sa më shumë të rinj. Nxitja e pjesëmarrjes qytetare të të rinjve është një nga ambiciet kryesore të Youth Panel.

Për realizimin e këtyre përgjegjësive, do të organizohen disa takime fizike dhe online. Aplikantët duhet të jenë të disponueshëm për të marrë pjesë në takimet e mëposhtme:

• 2 takime fizike të Youth Panel (takimi i kalimit të mandatit 21–24 shkurt 2027 dhe takimi i fundvitit në Tetor 2027). Datat dhe vendndodhja e saktë do të bëhen të ditura më pranë datës së takimit.

• Takime online gjatë gjithë vitit, zakonisht 1 takim në muaj, por frekuenca mund të ndryshojë në varësi të angazhimeve dhe ngarkesës së punës gjatë periudhave të ndryshme të vitit.

Përveç kësaj, çdo anëtar i Youth Panel do të ftohet (por nuk do të jetë i detyruar) të marrë pjesë në aktivitetet e mëposhtme:

• Një takim të Bordit të EYCA, një takim të Grupit Rajonal të organizatave anëtare të EYCA-s (zakonisht në Maj) dhe Konferencën vjetore të EYCA-s (në Qershor). Kjo është një mundësi e shkëlqyer për të kuptuar më mirë se si funksionon EYCA dhe për të kontribuar në përcaktimin e drejtimit të organizatës.
• Nëse jeni të interesuar dhe përzgjidheni, mund të përfaqësoni EYCA-n në Këshillin Këshillimor për Rininë të Këshillit të Europës dhe në disa konferenca rinore të BE-së. Një trajner i dedikuar i Youth Panel do t’ju asistojë në koordinimin e të gjitha këtyre takimeve dhe aktiviteteve, ndaj nuk ka nevojë të shqetësoheni nëse përgjegjësitë duken të mëdha! Trajneri do t’ju ndihmojë gjithashtu në zhvillimin e aftësive tuaja të nevojshme për realizimin e këtyre nismave.

Pra… kë po kërkojmë? Duhet të aplikoni nëse:

• Je 18–29 vjeç (duke pasur parasysh se në përfundim të mandatit mund të jesh maksimumi 31 vjeç).
• Të kesh Kartën Rinore Europiane të vlefshme në datën e aplikimit.
• Të dish të shprehësh qartë mendimin tënd dhe të bësh shaka në anglisht (pra, të kesh aftësi të mira komunikimi në anglisht). Brenda EYCA-s, komunikimi zhvillohet në anglisht, por do të inkurajohesh të përdorësh gjuhën tënde kombëtare kur komunikon me të rinjtë e tjerë.
• Të jesh i disponueshëm dhe i motivuar për të udhëtuar herë pas here në evente në vende të ndryshme të Europës. Të paktën, duhet të jesh në gjendje të marrësh pjesë në takimet fizike (21-24 shkurt dhe Tetor 2027; vendndodhja do të konfirmohet) si dhe në takimet online të Youth Panel.
• Të jesh shumë i motivuar për të qenë pjesë e EYCA Youth Panel dhe ta shohësh EYCA-n si pjesë të angazhimit tënd për dy vitet e ardhshme.

Ju inkurajojmë të aplikoni, pavarësisht nivelit apo fushës së arsimimit tuaj, si dhe pavarësisht nivelit të përfshirjes suaj në çështjet e Bashkimit Europian. Synimi ynë është të krijojmë një grup të larmishëm, ku perspektiva dhe përvojat e ndryshme të mund të shprehen dhe të zhvillohen, duke pasqyruar diversitetin e Europës!

Ajo që kërkojmë janë të rinj pasionantë, kreativë dhe aktivë. Prandaj, nëse jeni të apasionuar pas një ose më shumë çështjeve që lidhen me të rinjtë europianë, shpreheni këtë qartë në aplikimin tuaj – do ta marrim patjetër në konsideratë!

EYCA ofron mundësi të barabarta për të gjithë të rinjtë, pavarësisht gjinisë, kombësisë, përkatësisë etnike, fesë, orientimit seksual apo gjendjes shëndetësore.

Si të aplikoni

Hapi 1

Regjistroni një video prezantuese për veten (jo më shumë se 2 minuta – për këtë kriter do të jemi shumë striktë). Mund të orientoheni nga këto pyetje:

• Pse dëshironi të bëheni pjesë e EYCA Youth Panel?
• Për cilat tema apo çështje jeni të apasionuar dhe do të dëshironit të punonit? Nëse keni qenë më parë të angazhuar në mbështetje të një kauze, na tregoni. Çdo kontribut, sado i vogël, ka rëndësi!
• Çfarë perspektive të re apo aftësie të re do t’i sillnit Youth Panel?
• Si mund të ndihmoni në promovimin e mundësive që ofron Karta Rinore Europiane për të rinjtë në të gjithë Europën? Cilat janë idetë tuaja për të rritur pjesëmarrjen qytetare të të rinjve?

Ju duken këto pyetje shumë kufizuese? Mund t’i përdorni thjesht si frymëzim dhe të ndiqni skenarin tuaj. E rëndësishme është të shprehni qartë motivimin dhe angazhimin tuaj për këtë rol.

Nëse nuk ndiheni rehat të dilni përpara kamerës, mund të gjeni mënyra të tjera kreative për të realizuar videon (për shembull animacion, pamje video voice-over etj.)

Hapi 2

Ngarkojeni videon në YouTube (ju rekomandojmë ta vendosni videon si “unlisted”, në mënyrë që vetëm personat që kanë linkun të mund ta shikojnë).

Hapi 3

Plotësoni formularin e aplikimit dhe mos harroni të përfshini linkun e videos suaj të aplikimit në YouTube deri të premten, 30 tetor 2026, në orën 23:59 CET.

Çfarë ndodh më pas?

Pas mbylljes së aplikimeve, kandidatët e përzgjedhur në listën e ngushtë do të ftohen për një intervistë në fund të nëntorit. Mund ta konsideroni si një bisedë joformale, e cila do të na ndihmojë t’ju njohim më mirë dhe të sigurohemi se jeni personi i duhur për këtë angazhim gjatë dy viteve të ardhshme. Pas intervistave, 11 personat e përzgjedhur do të njoftohen nga ne. Edhe kandidatët që nuk janë përzgjedhur do të informohen për rezultatin.

Shënim përfundimtar

• Duam të shohim personalitetin tuaj dhe të dëgjojmë mendimet tuaja, ndaj ju sugjerojmë të shmangni përdorimin e AI gjatë aplikimit. Aplikimet e përgatitura qartësisht me ndihmën e AI nuk do të kenë përparësi.
• Ky është një pozicion vullnetar. EYCA do të mbulojë të gjitha kostot që lidhen me aktivitetet në të cilat do të merrni pjesë, ndaj nuk ka nevojë të shqetësoheni për aspektin financiar! Duam t’u ofrojmë të gjithëve mundësi të barabartë për të marrë pjesë, pavarësisht nga gjendja e tyre ekonomike.

Keni ende dyshime? Do të organizojmë një sesion online live Q&A për të gjithë ata që janë të interesuar të aplikojnë, të shtunën, 24 tetor, në orën 11:00 CET. Anëtarët e Youth Panel do të jenë të pranishëm për t’iu përgjigjur pyetjeve tuaja dhe për të ndarë përvojat dhe informacionet e tyre rreth programit. Nëse dëshironi të merrni pjesë, ju lutemi regjistrohuni përmes këtij formulari deri të mërkurën, 21 Tetor.