Youth Panel Albania është një nismë që mbledh një grup të rinjsh për të shkëmbyer ide, për të bashkëpunuar dhe për të zhvilluar së bashku projekte. Paneli u krijon anëtarëve mundësinë të propozojnë tema dhe aktivitete që lidhen me interesat e tyre, të identifikojnë mundësi bashkëpunimi dhe të përfshihen në realizimin e nismave. Qëllimi është që të rinjtë të kenë një rol aktiv që nga propozimi i një ideje deri te zbatimi i saj.
Çfarë u diskutua në takimin e parë
Në takimin e parë të Youth Panel Albania u prezantua qëllimi i nismës dhe u diskutua për rolin që anëtarët mund të marrin në zhvillimin e saj. Një pjesë e takimit iu kushtua Kartës Rinore Europiane dhe përfitimeve që ajo u ofron të rinjve që e zotërojnë. Diskutimi përfshiu mënyrat se si mbajtësit e kartës mund të shfrytëzojnë uljet dhe ofertat në fusha si udhëtimi, akomodimi, kultura, sporti dhe edukimi.
Anëtarët u ftuan të sjellin ide për projekte, të propozojnë bashkëpunime dhe të marrin pjesë rregullisht në aktivitetet e panelit. Gjatë takimit u diskutua edhe mundësia për të zhvilluar nismën e parë të përbashkët të Youth Panel Albania. Anëtarët u ftuan të propozojnë ide dhe të punojnë së bashku për ta kthyer njërën prej tyre në një propozim konkret.
Mundësitë për pjesëmarrje në vazhdim
Krahas zhvillimit të projekteve të përbashkëta, paneli do të ketë oportunitete të ndryshme për pjesëmarrje në konferenca, trajnime, workshop-e dhe aktivitete të tjera në Shqipëri dhe jashtë saj. Përmes këtyre aktiviteteve, anëtarët do të kenë mundësi të zhvillojnë aftësi, të shkëmbejnë përvoja me të rinj të tjerë dhe të krijojnë kontakte për bashkëpunime të ardhshme.







