Nis shpërndarja e Kartës Rinore Europiane në bashkëpunim me Bashkinë Tiranë. Ç`do të thotë kjo për gjimnazistët dhe studentët?

Të rinjve të Tiranës do t’u ofrohen të njëjtat përfitime si bashkëmoshatarët e tyre në Europë. Bashkia e Tiranës falë bashkëpunimit me Qendrën Youth Act, nisi shpërndarjen e Kartës Rinore Europiane për gjimnazistët dhe studentët, e cila njihet në 36 vende të Europës.

Kryetari i Bashkisë së Tiranës, Erion Veliaj dhe Ministrja e Rinisë dhe Fëmijëve, Bora Muzhaqi, shpërndanë kartat e para, të cilat ofrojnë një sërë mundësish për studentët shqiptarë. Kjo kartë është një mjet që fuqizon të rinjtë, duke ofruar zbritje në 36 vende të Evropës në sektorët: kulturë, akomodim, udhëtim, argëtim, trajnime e studime, sektorin shëndetësor, sektorin bankar, në turizëm, telekomunikacion dhe internet, sport, shopping, etj. Në total janë rreth 7 milionë kartëmbajtës dhe mbi 60.000 biznese që ofrojnë zbritje në Europë, ndërsa në Tiranë falë Agjencisë së Rinisë, 2000 shërbime të Kartës së Studentit, do të ofrojnë ulje edhe për mbajtësit e Kartës Rinore Europiane përgjatë vitit 2022.

Kryebashkiaku nënvizoi se shpërndarja e Kartës Europiane për të rinjtë do të vijojë edhe në qytetet e tjera të Shqipërisë.

Funksioni i dytë i Kartës Rinore Europiane është gjenerimi i informacionit falas nëpërmjet kodit të saj unik (password elektronik dhe username) për: bursa studimore në Evropë, mobilitet studentor, për programe trajnimi, shkëmbimi, workshope, konkurse ndërkombëtare, punë vullnetare, etj.