Më 4 maj 2026, Ministria e Turizmit, Kulturës dhe Sportit, Agjencia Kombëtare e Rinisë dhe Qendra Youth Act nënshkruan një marrëveshje bashkëpunimi me synim forcimin e bashkëpunimit institucional në funksion të fuqizimit të rinisë shqiptare dhe rritjes së mundësive për pjesëmarrjen aktive të të rinjve në fusha të ndryshme të jetës shoqërore, kulturore, arsimore dhe profesionale.
Duke vlerësuar rëndësinë e koordinimit ndërmjet institucioneve dhe strukturave kryesore që kontribuojnë në hartimin dhe zbatimin e politikave rinore në Shqipëri, palët u angazhuan të vijojnë mbështetjen për promovimin, zhvillimin dhe zgjerimin e zbatimit të Kartës Rinore Europiane në vend. Kjo mbështetje synon të krijojë më shumë mundësi, përfitime dhe akses për të rinjtë shqiptarë në nivel kombëtar dhe europian.
Në kuadër të këtij bashkëpunimi, Ministria e Turizmit, Kulturës dhe Sportit dhe Agjencia Kombëtare e Rinisë do të vazhdojnë të mbështesin iniciativat dhe programet e realizuara nga Qendra Youth Act, duke kontribuar në fuqizimin e rolit të Kartës Rinore Europiane si një instrument i rëndësishëm për zhvillimin e të rinjve.
Një nga rezultatet më domethënëse të këtij bashkëpunimi është organizimi për herë të parë në Shqipëri i Konferencës dhe Asamblesë së Përgjithshme të 42-të të European Youth Card Association (EYCA), një ngjarje me rëndësi europiane që do të mbledh në Tiranë përfaqësues të organizatave dhe institucioneve rinore nga e gjithë Europa. Ky event shërben si një platformë e rëndësishme për shkëmbimin e përvojave, krijimin e partneriteteve të reja dhe forcimin e rolit të Shqipërisë në rrjetet europiane të rinisë.
Palët mbeten të angazhuara për të vijuar bashkëpunimin afatgjatë në mbështetje të të rinjve shqiptarë, duke promovuar mundësi të reja zhvillimi, mobiliteti, pjesëmarrjeje dhe përfshirjeje në nivel kombëtar dhe europian.
