Vera është stina perfekte për t’i dhënë vetes kohën që librat meritojnë. Ditët më të gjata, ritmi më i qetë dhe pushimet krijojnë momentin ideal për të zbuluar histori të reja ose për t’u rikthyer te titujt që kanë pritur prej kohësh në listën tuaj të leximit.
Nëse po kërkoni frymëzim për leximet e kësaj vere, kemi përzgjedhur disa tituj nga Shtëpia Botuese “Dudaj”, të cilët anëtarët e Kartës Rinore Evropiane mund t’i përfitojnë me 20% zbritje.
Sekreti i fundit
Bota e Robert Langdonit del jashtë kontrollit ndërsa, tek po shoqëron akademiken e njohur Ketrinë Solomon në Pragë, për një ligjëratë ku është ftuar të flasë, ajo zhduket nga dhoma e hotelit pa lënë gjurmë. Larg shtëpisë dhe zonës së tij të rehatisë, Langdoni duhet të përdorë gjithë zgjuarsinë për t’u përballur me forca të panjohura dhe për të gjetur gruan që dashuron. Por Praga është një qytet i vjetër dhe i rrezikshëm, i mbushur me folklor dhe mister. Për më shumë se dy mijë vjet, valët e historisë kanë kaluar, duke lënë shenja të gjithçkaje ka ndodhur më parë. Langdoni nuk e di se një hije e errët e së kaluarës po e ndjek nga pas. Duhet të përdorë gjithë dijen e vet për të deshifruar botën përreth, përpara se të përpihet edhe ai nga rrathët e tradhtisë dhe mashtrimit që kanë gllabëruar Ketrinën.
Në një sfond kështjellash madhështore, kishash të larta, varrezash të fundosura në dymbëdhjetë shtresa dhe labirintesh nëntokësore, Langdoni duhet të lundrojë në një qytet hijesh që fshihet në sy të të gjithëve – një qytet që ka ruajtur sekretet e tij për shekuj dhe nuk i zbulon lehtë.
Kjo është një fushëbetejë ndryshe nga çdo përvojë e mëparshme, ku ai duhet të luftojë jo vetëm për jetën e vet, por edhe për të ardhmen e vetë njerëzimit.
“Sekreti i fundit” është romani i parë i Dan Brown-it pas më shumë se tetë vitesh dhe shënon rikthimin mbresëlënës të simbologut të Harvardit, Robert Langdon, këtë herë i përfshirë në një komplot që do të vërë në provë edhe fuqinë e tij të jashtëzakonshme mendore dhe do ta rrezikojë duke i marrë gjithçka që ka të shtrenjtë.
Historia e një gruaje, Ngjarja, Turpi
Annie Ernaux përpiqet këtu të rigjejë fytyrat e ndryshme dhe jetën e nënës së saj, e cila vdiq më 7 prill 1986, pas një sëmundjeje që i kishte shkatërruar kujtesën dhe integritetin intelektual e fizik. Ky libër vjen si rrëmim në ekzistencën e një gruaje, punëtore, më pas tregtare, e shqetësuar për të “ruajtur vendin e vet” dhe për të mësuar. Por edhe si një zbulim gjithashtu, i evolucionit dhe i dyfaqësisë së ndjenjave të një vajze ndaj nënës së saj: dashuri, urrejtje, butësi, ndjenjë faji e, më në fund, një lidhje mishtore me plakën e rrënuar.
«Nuk do ta dëgjoj më zërin e saj… Kam humbur lidhjen e fundit me botën nga e cila kam ardhur.»
“NGJARJA”
«Prej vitesh i sillem rrotull kësaj ngjarjeje të jetës sime. Sa herë lexoj në ndonjë roman rrëfimin për një abort, befas kridhem në një tronditje pa imazhe e pa mendime, sikur befas fjalët të shndërroheshin sakaq në ndjesi të dhunshme. E po ashtu, sa herë dëgjoj rastësisht La Javanaise, J’ai la mémoire qui flanche, apo cilëndo këngë që më ka shoqëruar gjatë asaj periudhe, më trazon thellë.»
“TURPI”
«Gjithmonë kam pasur dëshirë të shkruaja libra për të cilët e kisha të pamundur më pas të flisja, që e bëjnë të papërballueshëm vështrimin e të tjerëve. Po nuk kish çfarë turpi të më shkaktonte shkrimi i një libri që përcjell atë çka kam përjetuar kur isha në moshën dymbëdhjetëvjeçare.»
Annie Ernaux lindi në Lillebonne, më 1940 dhe është një nga zërat më autoritarë të panoramës kulturore franceze. Në librat e saj, ajo ka zbuluar një metodë të re dhe mundësinë që të jep autobiografia për të transformuar rrëfimin e jetës tënde në një instrument hetimi social, politik dhe ekzistencial. Konsiderohet një klasike bashkëkohore dhe adhurohet nga breza të tërë lexuesish dhe studentësh.
Në 2022 iu akordua Çmimi Nobel për letërsinë.
Mëndafsh
Franca, udhëtimet në det, aroma e manave në Lavildië, trenat me avull, zëri i Helenës.
Hervé Zhonkuri vazhdoi të tregonte jetën e tij, siç kurrë në jetë s’e kish bërë.
Ky nuk është një roman. Dhe as tregim nuk është. Kjo është një histori. Zë fill me një burrë që shkel botën anembanë dhe përfundon me një liqen që gjendet aty, në një ditë me erë. Burri quhet Hervé Zhonkur. Liqeni s’dihet se si.
I botuar më 1996, i përkthyer në më se tridhjetë gjuhë, “Mëndafsh” u bë një bestseller ndërkombëtar, dhe po ashtu një film me regji të François Girard me Michael Pitt, Keira Knightley dhe Alfred Molina.
Alessandro Baricco ka lindur në Torino.
Shkrimtar, i pasionuar pas muzikës klasike dhe operës lirike, autor dhe regjisor teatri, përkthyes i teksteve teatrale, autor dhe regjisor për kinema, është ndër themeluesit të Scuola Holden dhe drejtues i saj. Baricco është një nga shkrimtarët italianë më të vlerësuar nga kritika.
Romanet e tij kanë fituar çmime të shumta letrare, përfshirë Prix Médicis Étranger në Francë dhe çmimet Selezione Campiello, Viareggio dhe Palazzo del Bosco në Itali.
