Home / Rubrikë / Zëri i të rinjve / Zgjohu rini, bota eshte e jotja!

Zgjohu rini, bota eshte e jotja!

good-choice-bad-choice

Nga Kei Hysi.

 

Ndoshta tani që je duke lexuar këtë artikull ti je rehatuar diku në një kafene ose në shtëpi me nje smart phone në dorë ose ndodhesh përpara ekranit të një komjuteri. Të jem e sinqertë me ty dhe unë si ti kam një ekran përpara meje dhe një fletë të bardhë e cila pret të mbushet me mendimet e mia. Ndryshimi midis meje dhe teje është që unë po shfrytëzoj një mundësi që mu ofrua, që iu ofrua të gjithëve, të shkruaj një artikull, të bëj që zëri im të dëgjohet.

Jeta është e mbushur me një pafundësi mundësish të cilat kalojnë përpara syve tanë në çdo sekond, por ne zgjedhim të bëhemi të verbër. Përse e bëjmë këtë? Fare e thjesht, kemi frikë të dalim nga zona jonë e rehatisë ose e quajtur ndryshe zona komforte. Kemi frike të ënderrojmë, kemi frikë të guxojmë, të punojmë fort për të arritur qëllimet tona, për t’i bërë ëndrrat realitet. Por ne si rini nuk mund ta pranojmë dicka të tillë, kurrë. Kështu që ua hedhim fajin të tjerëve. “Shteti nuk ofron asgje. Asnje aktivitet nuk ka për rininë. Nuk ofrohet punë. Ky vend nuk do të ndryshojë kurrë.” Këto e plot shprehje të tjera tashmë janë bërë pjesë e përditshmërisë së rinisë shqiptare dhe janë rrënjosur një herë pergjithmonë në trurin tonë. Kështu që qëndrimi ynë i zgjatur në kafene duke shpenzuar kohën aspak në mënyrë të frytdhënëse apo duke jetuar një jetë të dyfisht virtuale është plotësisht i justifikuar. Fundja ç’faj kemi ne?

Më vjen keq që po jua them këtë, por është pikërisht faji ynë. Them “ynë” sepse unë jam pjesë e kësaj rinie, sepse e unë dikur kam menduar si ju, por jo për shumë gjatë. Ajo çka më bëri të kuptoja që e kisha gabim ishin mundësitë që shihja cdo ditë rreth meje. Ngulite dicka në mendje, një mundësi nuk vjen të të kërkoj ty, ti shkon ta kërkosh atë. Nëse ti ke një ëndërr atëherë shko pas saj, ndiqe atë, fluturo bashkë me të, lufto për të. Nëse jo, atëherë krijoje një ëndërr, formësoje në mendje, besoji dhe më pas bëje realitet. Ëndrrat nuk perfundojnë në momentin që t’i zgjohesh, madje ai është casti i kthimit të ëndrrave në realitet.

Përsa u përket mundësive që shoh rreth vetes sime, ato janë pikërisht të njëjtat mundësi që i shihni dhe ju, por unë nuk mjaftohem vetëm duke i pare këto mundësi, unë i ndjek ato. Nëse mendoni që asgjë nuk ofrohet për rininë shqiptare atëherë jeni plotesisht gabim. Aktivitete te ndryshme zhvillohen cdo ditë. Ju mund të mësoni një gjuhë të re, të bëheni vullnetarë në një organizatë, të ndërmerrni nismat tuaja, të ndiqni seminare të hapura, të shkoni në teater, tu bashkoheni aktiviteteve të ndërmarra nga të rinjte e tjerë, të hyni në konkurse, të zhvilloni veten duke e sprovuar atë. Unë nuk po them që gjithcka është e përkryer në vendin tonë sepse jam e vetëdijshme se ende ka punë për tu bërë dhe rinisë shqiptare nuk i ofrohen mjaftueshëm aktivitete. Por gjithashtu jam e vetëdijshme që nuk kemi nevojë për shumë që të fillojmë të ëndërrojmë. Dhe ja ku jam unë, përball ekranit të laptopit tim, me një letër tashmë jo më të bardhë. Ja ku jam unë duke marrë nje mundësi për të ndjekur pasionin tim, duke shkruar këtë artikull. Prandaj rini për ty kam vetëm një kërkesë: “Çohu nga divani i rehatisë dhe përballu me botën, ajo është duke të pritur.”

 

Germany, Baden-Wurttemberg, Teenage boy standing at crossing