Home / Njoftime dhe Evente / Panairi i librit/ Allende, Cercas dhe autorët më të mirë të momentit, në stendën Dudaj

Panairi i librit/ Allende, Cercas dhe autorët më të mirë të momentit, në stendën Dudaj

Panairi i 20-të i librit do të zhvillohet në datat 15 deri në 19 nëntor, gjatë të cilave shtëpitë botuese do të prezantojnë disa nga librat e tyre të rinj. Shtëpia botuese Dudaj, edhe këtë vit vjen me disa prej botimeve më të mira, si edhe emrat më të vlerësuar në botë.

Isabel Allende është një nga zërat më të rëndësishëm të narratives bashkëkohore në gjuhën spanjolle. 75 vjeçarja ka lindur në Lima dhe më pas ka jetuar në Kili deri në vitin 1973. Pas grushtit të shtetit të Pinoçetit u vendos në Venezuelë dhe më pas, në Shtetet e Bashkuara të Amerikës. Tashmë shkrimtarja jeton në Kaliforni me bashkëshortin e vetë.

Isabel Allende

Novelat e Allende janë bazuar në eksperiencën e vetë, si edhe historinë e shumë grave, duke kombinuar mistiken me realizimin. Përveç librave, ajo ka dhënë mësim në disa Universitete amerikane.

“Vendi im i imagjinuar” është një udhëtim nostalgjik në Kili. Ashtu si personazhet e disa romanëve të saj të paharrueshëm, Isabel Allende, e shënjuar nga një ndjenjë e dhimbshme mërgimi, kthehet me kujtime te rrënjët e saj.

Sot, pas shumë kohe të jetuar dhe pas shumë braktisjesh, shumë librash të shkruar dhe shumë mall, Kilit të Isabelës, të imagjinuar dhe të ëndërruar, i mbivendoset një vend më në fund real: krenaria e lumtur e rrënjëve.

Kështu, një vend i sajuar në mendje bëhet toka e prekshme e origjinës dhe, nëse e gjitha kjo nuk mjafton për të fshirë dhimbjen e mërgimit, shërben për t’i dhënë një kuptim dhe një vlerë mallit.

Javier Cercas

Shkrimtari dhe gazetari spanjoll Javier Cercas, është një prej emrave më të njohur. Vepra e të cilit është përkthyer në mëse 30 gjuhë dhe është vlerësuar me shumë çmime. Si edhe ka fituar dy çmime për tërësinë e veprës së tij: Il Premio Salone Internazionale del Libro di Torino më 2011 dhe Prix Ulysse më 2012.

Libri i tij i fundit është “Mashtruesi”, një roman i mahnitshëm pa fiksion dhe i tejngopur me fiksion. Por, fiksioni nuk vjen prej autorit, atë e sjell Enrik Marko, një 90 vjeçar nga Barcelona, I cili për vite me radhe i mashtroi të gjithë. Duke e paraqitur veten sikur i kishte mbijetuar Holokaustit, gjersa më 2005 u demaskua, pasi kishte kryesuar vite me radhë shoqatën spanjolle të të mbijetuarve dhe kishte arritur të bëhej hero.

Javier Cercas e ngujon enigmën e personazhit dhe njëkohësisht futet në shtresat më të thella e më të sikletshme të vetes sonë dhe të së kaluarës sonë të afërt. Si rezultat, ka ardhur ky libër, që bën fjalë jo vetëm për Enrik Markon, po edhe për ty./a.f./Dritare.net