Kodi i veshjes në zyrë

 

Është vënë rë se shpesh, me ose pa dashje gabojmë mënyrën e veshjes dhe bëhemi shkelës të ashtuquajturës dress code të cilës duhet t’i përmbahemi në ambjentet e zyrës dhe ambjentin e punës.

Në një intervistë me drejtorë të zyrave të burimeve njerëzore, në disa prej kompanive më të mëdha amerikane, u evidentuan shkeljet më të shpeshta të rregullores së ndërmarrjeve, ose ndryshe të njohura si thyerje të “Kodit të etikës dhe i veshjes në punë”.

Pjesa më e madhe e tyre u përgjigj se shpesh kanë të bëjnë me punonjës që kanë një veshje jashtëzakonisht casual (47%), në vendin e dytë qëndron gabimi i ekspozimit të  pjesëve të zhveshura të trupit (32%).

 

 

Sipas zyrave të burimeve njerëzore amerikane nuk përbëjnë problem, ekspozimi i tatuazheve apo i piercing (6%), as lyerja e flokëve me ngjyra si jeshile apo të ndonjë ngjyre të pazakontë (3%). Kodi i veshjes varion nga sektori apo ambjentet e punës si edhe nga shteti ku gjendeni.

Në shumicën e rasteve rregullorja rezulton të shkelet nga gratë prandaj, ketu në vijim gjeni disa këshilla për veshjen tuaj në ambjentet e punës që vlejnë pak a shumë në të gjithë botën:

1. Evitoni veshjet e shkurtra dhe të ngjitura pas trupit ose ato shumë të hapura e me dekolte të madhe. Fustanet që vishen në diskotekë apo në një darkë me miq, nuk janë të përshtatshëm në zyrë. Nuk po themi të vishemi keq apo gjithmonë serioz. Zgjidhni veshje që lëjojnë të dukeni të rregullt dhe të mos tregoni dekoltenë pasi kolegët dhe shefat do të mendojnë se jeni duke kërkuar të bëni karrierë në saj të aftësive fizike dhe jo profesionale.
2. Kujdes këpucët me platformë. Në zyrë është bon- ton të mos vishen këpucë me platformë apo me gomë të trashë. Mirë do të ishte të vishen këpucë me taka me lartësi jo më shumë se 10 cm. Nëse keni mundësi mund të evitohen edhe sandalet e të zgjidhen këpucë të mbyllura dhe elegante.
3. Make-up sa më natyral. Duhet të keni një pamje të kuruar me flokë të rregullt dhe me tualet natyral pa rënë në sy. Në rast se tualeti juaj është i rëndë do të mendohet se jeni person sipërfaqësor që nuk e bën mirë punën pasi i kushtoni më shumë rëndësi pamjes së jashtme.
4. Mos e teproni me aksesorë apo bizhuteri. Vathët në formën e rrathëve të mëdhenj dhe rripat më gurë e me xixa vendosen në kohën e lirë. Në zyrë bizhuteria duhet të jetë minimaliste. Më mirë zgjidhni një “low profile” në përcaktimin e aksesorëve elegant.
5. Kujdes me tatuazhet në trup. Ndoshta në USA drejtorët nuk vënë re tatuazhet apo piercing, por në Evropë, sidomos në disa sektorë nuk shihen me sy të mirë. Për të evituar problem mundohuni t’i fshihni deri sa të keni kuptuar Kodin e përshtashëm të veshjes së ndërmarrjes dhe sektorit ku punoni.