Home / Dua (çdo ditë e) më shumë Shqipërinë…

Dua (çdo ditë e) më shumë Shqipërinë…

Nga Suada Daci

Me siguri keni dëgjuar të flitet këto ditë për “South Outdoor Festival”. Festivali i natyrës dhe aventurës u mbajt për tri ditë në jug të vendit, ekzaktësisht në fshatin Pilur, 10 kilometra nga Himara. Gjatë këtij harku kohor, rreth 1500 njerëz nga Tirana, por edhe turistë të huaj, italianë, anglezë, gjermanë etj. u morën me sporte e aktivitete, si: hiking, scuba diving, joga, jeep safari, mountain bike, paragliding etj. krah trajnerëve profesionistë.

Por jo vetëm kaq, në Pilur të gjithë të pranishmit shijuan edhe kuzhinën tradicionale vendase, ku çdo gjë ishte kuruar deri në detaje nga masterchef-i i njohur Sokol Prenga.

Ky aktivitet i organizuar nga “Giz Albania” çeli edhe sezonin turistik në Himarë, por kësaj here kishte në qendër të vëmendjes promovimin jo vetëm të detit, por edhe të malit, për të treguar që turizmi nuk nënkupton vetëm sezon veror, por dhe turizëm malor dhe aventurë.

Qershia mbi tortë ishte dita e fundit e festivalit, kur të gjithë u nisën drejt dhe Llogarasë për të provuar magjinë e parashutizmit, si dhe për të shijuar mrekullitë e plazhit të Gjipesë.

Me çfarë të shkojmë në Pilur? Shoferët, “heronjtë” e “South Outdoor Festival”

Jugu i Shqipërisë mbetet një nga destinacionet e mia të preferuara verore. “NO SOUTH, NO VACATION”, kjo është motoja që ka shoqëruar gjithnjë pushimet e mia verore. Por ndonëse një fanatike e kësaj zone, nuk e kisha marrë kurrë mundimin të ngjitesha pak kilometra më lart Himarës, pra në Pilur. Rruga për në fshat (për hir të së vërtetës) nuk ishte aspak komode dhe për ta ngjitur duheshin patjetër makina fuoristrada apo furgona. Për këtë kishin menduar organizatorët e festivalit, të cilët kishin siguruar transportin për qytetarët. Në çdo 30 minuta (duke filluar nga ora 07:00-00.00) niseshin nga Himara makina me njerëz, të cilët mezi ç’prisnin të shijonin sportet e ndryshme.

Por a e dini se sa herë u është dashur drejtuesve të automjeteve të ngjisnin dhe zbrisnin të pranishmit?

“Më shumë se 20 herë”, – tregon me buzëqeshje një prej shoferëve të “Giz Albania”. “Nuk është hera e parë që bëj rrugë të vështira, edhe në veri të vendit ka rrugë të paasfaltuara, por këtë herë ishte shumë e shpeshtë sepse njerëzit duheshin çuar të gjithë në lokacion.  E kam përshkuar këtë rrugë për më shumë se 20 herë gjatë një dite, ama kur jam shtrirë në mbrëmje në krevat nuk i ndieja më këmbët”, – thotë ai për Blitz.al.

Një gjë është pak, por e sigurt, pa shoferët e “Giz” dhe shoferët e kontraktuar, ky aktivitet do të ishte i dështuar.

Në Pilur s’ka vetëm aventurë, gjen edhe personazhe…

Një fshat i vogël, me rreth 600 banorë, padyshim që do të ketë edhe personazhe interesante. Njëri prej tyre ishte Jani. Për më shumë se 40 vjet ai bënte të njëjtën gjë, thurte shporta dhe kanistra.

“Unë kam që në moshën 12-vjeçare që merrem me këtë zanat. Ma ka lënë trashëgimi babai, po ashtu edhe unë fëmijëve të mi. Kanistrat dhe shportat i thurim me shelgun e lumit që ka një jetëgjatësi shumë të madhe. Para ca kohësh gjeta një kanistër 70- vjeçare që e kishte punuar nëna ime dhe u gëzova shumë që më ra përsëri në dorë. Periudha e verës është koha më e mirë për të punuar, edhe pse unë dhe familja ime një pjesë të mirë të punëve tona i shesim edhe në Greqi”, – thotë ai për Blitz.al.

Blitz.al