Home / Njoftime dhe Evente / Ditët kalojnë shpejt, OSCAL 2017 është duke ardhur…

Ditët kalojnë shpejt, OSCAL 2017 është duke ardhur…

Konferenca e parë vjetore ndërkombëtare në Shqipëri, Open Source Conference Albania, do të zhvillohet për të katërtin vit radhazi për të promovuar në një masë më të gjerë frymën e kulturës së informacionit të hapur, programet me kod burimor të hapur dhe lirinë e teknologjisë në tërësi. OSCAL organizohet më 13 & 14 maj 2017 pranë ambienteve të OFIÇINA dhe Harry Fultz nga Open Labs Hackerspace, komuniteti që ka qëllime dhe ideologji të përbashkëta me konferencën. Një larmishmëri prezantimesh dhe puntori shumë interesante, që do të mbahen paralelisht në disa salla, do të jenë pjesë e të dyja ditëve të konferencës. Pra, që prej orës 09.00 deri në orën 18:30 pjesëmarrësit do të mund të ndjekin temat e tyre të preferuara ose, nëse kanë dëshirë të përfshihen më tepër, do të mund të marrin informacione më të detajuara për projektet me burim të lirë dhe të hapur (free open source) tek stendat përkatëse të cilat gjithashtu do të jenë prezente. Vlen të përmendet se Mozilla, Fedora, LibreOffice, OpenStreetMap, Wikipedia, phpList, Nextcloud janë vetëm disa nga komunitetet nga ku pjesëmarrësit e OSCAL mund të marrin më tepër informacion rreth projekteve.

Tematika e #OSCAL17

“Internet of People” është slogan që do të shoqërojë edicionin e katërt të OSCAL, për të theksuar rolin tonë si individë në industrinë e teknologjisë. Teknologjia nuk duhet të merret si e mirëqenë, ajo nuk është! Njerëzit janë! Në fund të fundit ne e krijojmë atë. Dhe çfarë ka rëndësi më së shumti është qëllimi për të cilin zhvillohet teknologjia: impakti social që ajo shkakton.

Pjesëmarrja

Kushdo që ka dëshirë të jetë pjesë e Open Source Conference Albania mund të marrë pjesë pa pagese, ndërkohë që ekziston edhe mundësia e donacioneve për të gjithë ata që kanë dëshirë të kontribuojnë financiarisht në organizim.

Kujdes: pa një biletë (e paguar apo falas) nuk do të mund të hyni në konferencë.

Duke zgjedhur një nga opsionet e biletave ju mbështesni financiarisht vullnetarët e ekipit organizativ të OSCAL dhe Open Labs Hackerspace.

Dëshironi të regjistroheni për #OSCAL2017? Klikoni Këtu për të marrë biletën tuaj.